Isang independiyenteng survey ang isinagawa kamakailan sa bayan ng Pandi, Bulacan upang sukatin ang kasalukuyang pulso ng mga botante kaugnay sa nalalapit na halalan sa Mayo 12, 2025. Ayon sa resulta ng survey na isinagawa noong Abril 19 hanggang 21, 2025, lumalabas na 81% ng mga tinanong ay nagsabing iboboto nila si Mayor Rico, ang kasalukuyang punong-bayan ng Pandi. Samantala, 10% ang nagsabing susuporta sila kay “Darna” Kat Marquez, at 9% naman ang nanatiling hindi pa tiyak ang kanilang desisyon.
Ang survey ay isinagawa sa pamamagitan ng face-to-face interviews sa kabuuang 2,500 respondents mula sa iba’t ibang barangay ng Pandi. Ang mga kalahok ay napili sa paraang random, isang respondent lamang bawat kabahayan, at may pagitan na hindi bababa sa tatlong bahay sa bawat isa. May margin of error ang survey na ±1.94%.
Bagamat malinaw na may malawak na suporta si Mayor Rico, iginiit ng kanyang kampo na mahalaga pa ring manatiling aktibo at masigasig sa kampanya upang masigurong maipagpapatuloy ang mga nasimulang programa sa bayan. Sa kabilang banda, patuloy rin ang pangangampanya ni “Darna” Kat Marquez na nagsusulong ng kanyang sariling plataporma at hangaring makapaghatid ng pagbabago.
Ayon sa mga tagapag-organisa ng survey, ang mga resulta ay sumasalamin sa kasalukuyang pananaw ng mga botante. Hinihikayat pa rin ang mga mamamayan ng Pandi na gamitin ang kanilang karapatang bumoto at pumili ng lider na sa tingin nila ay tunay na maglilingkod nang buong puso.
